ملکہ کوہسار مری میں موسم سرما کی پہلی برف باری

ملک بھر سے سیاحوں کی بڑی تعداد نے موسم سرما کی پہلی برف باری سے لطف اندوز ہونے کے لیے ملکہ کوہسار مری اور ملک کے شمالی علاقوں کا رخ کرلیا۔

مری میں روئی کے برستے گالے دیکھ کر لوگوں کے چہرے کھل اٹھے اور انہوں نے خوب ہلہ گلہ کیا، جبکہ تفریحی مقامات پر میلے کا سماں نظرآنے لگا۔ کاغان میں موسم سرما کی پہلی برفباری نے وادی کے حسن کو چار چاند لگا دیئے۔ سوات میں برف کے سفید گالوں نے ہر چیز کو ڈھک دیا اور درختوں اور عمارتوں کی چھتوں اور سڑکوں نے سفید چادر اوڑھ لی۔ چترال میں برفباری کے باعث لواری ٹاپ بند ہوگیا جس کی وجہ سے ملک کے دیگر حصوں سے زمینی رابطہ منقطع ہو گیا۔