Header Ads

Breaking News
recent

منشیات کا ڈان پھر جیل سے فرار

میکسیکو میں سینالاؤ نامی منشیات کے گروہ کے سابق سربراہ جوکوئین گزمین ایک مرتبہ پھر جیل سے فرار ہونے میں کامیاب ہو گئے ہیں۔
سرکاری حکام کا کہنا ہے کہ ’شورٹی‘ یا ’پست قد والا‘ کے نام سے معروف جوکوئین گزمین نے انتہائی نگرانی والی اس جیل سے فرار کے لیے ایک طویل سرنگ استعمال کی۔

میکسیکو کے قومی سلامتی کے سربراہ کے مطابق شورٹی نے الٹی پلانو کی جیل سے فرار کے لیے ایک میل طویل جو راستہ استعمال کیا اس میں سیڑھیاں اور روشندان بھی ہیں۔

اس سے قبل خبر رساں ادارے اے پی نے بتایا تھا کہ نیشنل سکیورٹی کمیشن نے اپنے بیان میں بتایا ہے کہ گزمین سنیچر کی رات کو اپنی کوٹھری سے غائب پائے گئے۔

انھیں میکسیکو شہر سے باہر الٹی پلانو نامی جیل میں رکھا گیا تھا۔
سکیورٹی حکام نے بتایا ہے کہ شب نو بجے کے قریب وہ نہانے کے لیے گئے تھے۔ جب کچھ دیر تک دکھائی نہ دیے تو جس کوٹھری میں انھیں رکھا گیا تھا وہاں کی تلاشی لی گئی مگر وہ خالی تھی۔
گزمین کی تلاش کا عمل جاری ہے اور اس سلسلے میں قریب موجود ہوائی اڈے کو بھی پروازوں کے لیے بند کر دیا گیا ہے۔
خیال رہے کہ جوکوئین گزمین کو سنہ 1993 میں 20 سال کی سزا سنا کر جیل بھیج دیا گیا تھا تاہم وہ آٹھ سال بعد فرار ہونے میں کامیاب ہو گئے تھے۔

انھیں دوبارہ گذشتہ برس گرفتار کیا گیا تھا۔ وہ پہلی بار جیل کے محافظوں کو رشوت دے کر میلے کپڑوں کے تھیلے میں چھپ گئے تھے اور یوں جیل سے فرار ہو گئے تھے۔

خیال رہے کہ منشیات کا کاروبار کرنے والے امریکہ اور میکسیکو کی سرحد پر سرنگیں بھی بنا لیتے ہیں۔
سینالاؤ گروہ دنیا میں کوکین، بھنگ، چرس اور دیگر منشیات کو امریکہ میں جہاز، زمین اور سمندر کے ذریعے کنٹرول کرتا ہے اور اس کے بارے میں کہا جاتا ہے کہ اس کے 50 ممالک کے ساتھ رابطے ہیں۔
واضح رہے کہ امریکی سٹیٹ ڈیپارٹمنٹ نے جوکوئین گزمین کی گرفتاری کی اطلاع دینے والے کے لیے 50 لاکھ ڈالر انعام مقرر کیا تھا۔

No comments:

Powered by Blogger.